就嚟踏入11月，終於嚟到我最鍾意嘅秋冬啦！天氣涼涼哋真係好舒服~再加上近排政府宣佈咗0+3，相信大家都會曾住呢個時間飛出香港啦>< 但無理由帶住個布丁頭去影相嘅嘛，等我推薦幾款適合秋冬嘅髮色俾大家啦！即使唔去旅行，都可以染嚟改變吓自己，轉吓新形象^^
橘啡色
第一個介紹嘅就係好多女明星都有染嘅橘啡色啦~2022年橘色真係一個大熱嘅染髮顏色，吸睛得嚟仲好顯白，配合翻簡單嘅妝容，就企係時尚嘅尖端^^ 好似BlackPink嘅Jennie咁，橘啡色嘅頭髮令佢更加突出吸引，真正展現出甜又得型又得！
如果擔心橘色太誇張，都可以試吓用挑染嘅方式去加入橘色，又係另一種挑皮嘅感覺！
紅莓啡色
紅莓啡色係小編秋冬最常染嘅顏色之一，佢唔係正紅色咁高調，但當陽光射落去頭髮嘅時候就會好突出，襯唔同嘅髮型都好好睇！紅莓啡可以帶出一種少女好活潑，温暖嘅感覺，仲可以令人睇落氣色好好，又容易carry，連李聖經都染過，推薦大家今個冬天都去試吓！
茶啡色
除咗以上嘅色系，其實今年都特別流行深色系，茶啡色都係一個好多人選擇嘅顏色！茶啡色有一種霧面輕盈嘅感覺，非常之顯白，仲可以帶出一個人嘅氣質，特別適合冬天~用卷髮器輕輕卷下頭髮，就可以帶出一種蓬鬆好髮質嘅感覺！
霧黑色
最後推薦嘅就係霧黑色，無睇錯啊，呢排好多人都開始回歸起點，染翻個霧黑色過秋冬~純黑色入面加啲霧灰嘅原素，令到髮色更加有層次，又吾會太死實，唔少女星會配合翻唔同長短嘅髮型，令到成個look更加時尚多變～好似泫雅咁，一頭霧黑色嘅短髮令佢更加活潑有個性！
頭髮嘅顏色可以改變一個人嘅形象，大家都係時候去轉下髮色迎秋冬啦！
#秋冬髮色#霧黑色#茶啡色#泫雅#紅莓啡色#顯白#橘啡色#Blackpink#新形象 #Jennie#李聖經#蓬鬆#染髮顏色
