又到聖誕~又到聖誕~臨近聖誕，約好曬fd齊齊開聖誕patry未啊？
想聖誕味濃啲，除咗可以喺屋企擺喺聖誕樹、聖誕花圈呢啲例牌飾物之外，不妨整返幾個聖誕甜品或者小食係party嘅時候齊齊開心share！以下係幾款超級易整（手殘黨都輕鬆handle到）嘅聖誕甜品，不妨試下：
一. 士多啤梨聖誕老人
聖誕又點少得聖誕老人呢？撞啱12月士多啤梨當造季節，粒粒又香又甜，最啱拎嚟整甜品！呢一個士多啤梨聖誕老人，應節得嚟夠曬得意，最重要嘅係，簡單快手！
材料（10個）：
士多啤梨（越大粒越好） 10粒
鮮奶油 1/2杯
砂糖 1湯匙
步驟：
- 士多啤梨去蒂，然後中間一開二。
- 奶油加糖打發（想味道濃厚啲邪惡啲可以轉cream cheese，如果係懶人可以直接超市打發好嘅罐裝奶油都得）
- 將奶油裝入唧花袋，擠喺士多啤梨上，最后帮“聖誕老人”戴返頂聖誕帽，喺士多啤梨尖尖位擠少少奶油作為裝飾，大功告成！
二. 朱古力聖誕樹
如果屋企無位擺真·聖誕樹，咁整返個聖誕樹小食都可以增添節日氣氛。
材料同樣簡單：
朱古力蛋糕 1個（有心思嘅可以自己焗一個，或者係餅鋪買都得）
鮮奶油 一盒
糖粒 裝飾用
- 將蛋糕切成三角形片狀
- 奶油輕微打發，塗在蛋糕上，然後逐層逐層搭起蛋糕，一顆聖誕樹嘅雛形就出嚟啦！
- 最後淋上奶油，撒上糖粒就搞掂！
三. 聖誕熱紅酒
佳節party聚會吹水又點少得嘢飲呢？介紹返聖誕節限定應節飲品Mulled Wine，即係加咗香料煮熱嘅紅酒，聞落香噴噴，飲落甜甜地，仲暖笠笠添！
材料：
Mulled wine 香料包一個（一般大型超市有售）
紅酒一支（普通超市買到嘅就ok）
- 將香料擺入茶包裡面，煲湯袋都得。
- 紅酒連同香料包倒入煲內，慢火（切記係慢火）煮大約10-15分鐘
- 待紅酒微滾，就可以熄火蓋上煲蓋焗5分鐘，等香味可以更加濃厚就飲得啦！
以上食譜全部0失敗！屋企有小朋友嘅仲可以同小朋友一齊enjoy製作聖誕小食嘅樂趣添（當然，聖誕紅酒就唔適合小朋友啦，留返俾情侶閨蜜啦~）
