冬日美肌貼士 4個秋冬乾燥保濕方法

呢排終於有種「香港入冬了」的感覺。氣溫急降加12月打風，雖然唔係8號，但係都叫大風落雨，行喺街都真係feel到一陣寒意~ 同埋皮膚都乾咗…啲北風吹過嚟，塊面會覺得有少少痛添！久違嘅乾敏症狀好似蠢蠢欲動想嚟料！又係時候出動我嘅冬日護膚4大錦囊！

保濕方法1: 加濕器

唔知你地會唔會有相同嘅經歷，無論屋企，公司定係商場，一降溫就開始開暖氣，雖然個人會feel到無咁凍係舒服啲，但久而久之就眼乾、喉嚨乾、皮膚乾！因為暖氣會將肌膚表層嘅水分都會抽乾埋，皮膚就會因為流失水分而變得乾燥，甚至甩皮。而長期嘅皮膚缺水亦會導致肌膚屏障受損，引發敏感。所以當身處嘅地方有開暖氣嘅時候，Please安排一個加濕器擺喺附近，保持令肌膚感到舒適嘅濕度。

保濕方法2: 沖涼後保濕

冬天最正莫過於沖熱水涼，一沖就唔想停。但次次沖完無幾耐就會feel到身上嘅皮膚開始痕…咁係因為過熱嘅水或者碱性過高嘅清潔用品會帶走皮膚嘅油脂層，令肌膚更容易乾燥痕癢。所以我平時沖完涼，就會用毛巾輕輕印乾皮膚，趁仲有少量水分嘅時候，即刻擦body lotion，阻止水分流失之餘，可以令潤膚成分更好咁滲透入皮膚，保濕效果更好，就可以keep住冬天都滑溜溜啦~

保濕方法3: 護膚品都要跟住換季

除咗衫要轉季，Skincare當然都要啦！仲用緊夏天的護膚品，已經不足夠。要換成成分滋潤啲，最好有少少油脂幫助鎖水同安撫敏感肌嘅保濕產品。另外，油性皮膚嘅sis唔好因為自己油性肌膚就以為唔需要潤膚品啊！為咗維持肌膚屏障穩定，冬天都係要選擇返啲水分高，油分低嘅保濕產品，洗面次數都不宜太多，避免肌膚過度乾燥。